KALIBO, Aklan—Nakataeana nga igapasaka it Madalag Municipal Police Station ro nagakaigo nga kaso kontra sa suspek nga nagbaril-patay sa sangka eaeaki nga nauna eun nga nasapwan nga owa it kabuhi sa Brgy. Cabangahan, Madalag ko mga nagtaliwan nga adlaw.
Suno kay Police Master Sergeant Rufino Donato, imbestigador it Madalag PNP nga base sa autopsy result sa cadaver it biktima nga ginkilaea kay Noel Nadate, 56-anyos ag residente it nasambitan nga lugar hay nagaguwa nga nakaangkon raya it tatlong ka mga tama it baril sa anang likod nga nag-eapos pa sa prenti it anang eawas.
Nagaguwa man nga ro anang mga naangkon nga tama it pagbaril ro naging rason it anang hinali nga kamatayon.
Samtang ginpahayag man ni PMSgt. Donato nga sa makarun hay may natumod eun sanda nga person of interest sa pagkamatay it biktima.
Madumduman nga nasapwan eun lang nga una eon sigon sa state of decomposition ro bangkay it biktma samtang nakasuksok it underwear ag puno it eutay.
Nasayuran nga naga-isaeahanon eamang nga naga-istar sa andang baeay ro biktima kung siin may kaeayuon man ro mga kaeapit nga baeay ag karsada.
