KALIBO, Aklan–Nagapadayun pa ro imbestigasyon it mga otoridad sa Amerika kasunod it natabo nga random shooting sa estado it Philadelphia ko adlaw it Sabado nga ginkamatay it sangka Pinoy nga abogado nga si John Albert Laylo.
Suno kay Bombo International Correspondent Greg Aguilar nga owa pa it natumod nga suspek ro mga otoridad kamana man nga padayun pa ro andang pagsikyar sa mga CCTV footage sa lugar para masayuran kung siin nga direksyon maghalin ro pagbaril.
Kaeabanan sigon nga nagakatabo ro random shooting ukon owa it karason-rason nga pagpang-baril sa mga mabahoe nga siyudad it Amerika.
Maskin ro mga otoridad hay blangko man sa rason it nagakatabo nga random shooting.
Ginapahayag nga nagbisita eamang ro biktima sa andang igbata sa Philadelphia ag paadto eon kunta sa airport kat matabo ro insidente.
Madumduman nga ginpaueanan it bala ro ginasakyan nga Uber it biktima kung siin kaibahan kara ro anang ina.
Nag-angkon sigon it fatal nga lastro sa ueo ro nasambit nga Pinoy lawyer nga naging rason it anang pagkamatay ko adlaw it Lunes.
