KALIBO, Aklan–Ginplastar it National Commission on Senior Citizen ro nagakaeain-eain nga benepisyo nga maangkon it mga senior citizen nga nakapa-idaeom sa laye partikular ro social pension.
Ginpahayag ni Commissioner Reymund Mansilungan, National Commission on Senior Citizen nga ginaduso sa makaron sa kongreso ro suhesiyon nga paghimu sa social pension nga maging elderly pension ukon pagtao it pension sa tanan nga senior citizen maskin anuman ro estado sa kabuhi.
Suno pa kay Mansilungan nga kapin sa 11.8 million ro mga senior citizen sa bilog nga nasyon apang bangud nga ro social pension hay para eamang sa mga indigent nga senior citizen, 3.8 million eamang ro mga nakasueod sa dag-unan nga budget.
Samtang, aprobado eon sigon sa kongreso ro bill nga ginpasa ni Congressman Rodolfo “Ompong” M. Ordanes it Senior Citizen Partylist nga ubrahong 1,000 pesos ro presente nga 500 pesos nga bueanan nga social pension ag nagahueat eamang nga aprubahan ro budget para sa masunod nga dag-on.
Ginasugid nga kaeabanan sa mga benepisyaro nga centenarian ko dag-on 2020 ag 2021 ro indi sigon nanda mataw-an it P100,000 reward bangud sa kakueangan it proof of age ukon birth certificate bangud nga nasunog sigon ro archives it Philippine Statistics Authority ukon PSA tuga it giyera ko 1947.
