KALIBO, Aklan—Owa gin-grant it National Inter-Agency Task Force ro hingyo it Antique Provincial Government nga magpatuman it border restrictions sa andang probinsya.
Nabatun eun ni Governor Rhodora Cadiao, ro abisu it National IATF pamaagi kay DILG Undersecretary Epimaco Densing III kung sa siin owa ginpaboran ro hingyo karang paga-striktuhan anay ro andang border hasta sa Abril 19 bilang tikang agud nga sok-ean ro pagkalhit it covid-19 sa andang probinsya.
Ro naging tikang man ni Cadiao hay kasunod it sigidas nga pagtinaas it mga kaso it COVID-19 sa bilog nga Western Visayas.
Sandig man sa pagsinoeundan it National IATF nga ro mga lugar nga una sa ideaum it Modified General Community Quarantine (MGCQ) hay indi pwede magpatuman it border restrictions bangud raya hay para eamang sa mga lugar nga ginapatuman ro Enhanced Community Quarantine (ECQ).
Sa pihak kara, magapatuman sa gihapon it hugot nga pagbantay sa mga borders ro probinsya it Antique agud nga masiguro nga indi eon madugangan pa ro mga nailistang kaso it makamaeatay nga virus.
