KALIBO, Aklan—Umpisa makaron nga adlaw it Sabado, Setyembre 25, nagpatuman ro National Irrigation Administration ukon NIA-Aklan-Capiz it cut-off period sa pagpaguwa it suplay it tubi nga pang-irigasyon sa eastern side it probinsiya it Aklan.
Raya ro ginkumpirma ni Engr. Darlene Macapobre, operations unit head it NIA-Aklan-Capiz.
Suno kana nga sa Oktubre 15, uman sanda nga magapaguwa it suplay it tubi mga kaeanasan para sa pag-umpisa it dry cropping season sa 2022.
Sa pihak nga parte, sa western side it probinsiya, nag-cut-off sanda ko nagtaliwan nga Setyembre 15 ag nakataeanang magabukas sa Oktubre 15.
Ginpaathag ni Engr. Macapobre nga ro pagpapundo anay sa suplay it tubig it NIA hay agud nga taw-an it daean ro nagapapadayon nga construction sa mga irrigation canal agud nga mas pang makatau it maayos nga serbisyo sa mga mangunguma.
Nagapati man ro NIA nga ro andang gintaeana nga cut-off period sa pagpaguwa it tubi hay indi man masyadong maka apekto sa mga tanum nga paeay bangud nga sigidas man ro pag-uean-uean makaron.
Antes man sigon nga magbukas it uman ro andang patubi hay magapatigayon it clearing operations sa bulig it mga irrigators association.
