KALIBO, Aklan—Padayun ro pag-engganyo it gobyerno probinsyal sa mga pumueoyo nga magpasakop sa tatlong adlaw nga national vaccination drive nga maga-umpisa eon hin-aga nga adlaw it Lunes hasta it Disyembre 1.
Tuyo it aktibidad nga makapatigayun it massive vaccination sa mga owa pa nabakunahan kontra COVID-19.
Raya hay bukas sa tanan nga naga-edad 12 hasta 17 anyos ag 18 anyos pataas nga mga pumueoyo.
Nagaeaum ro tagsa-tagsa ka mga lokal nga gobyerno sa bilog nga probinsya it Aklan nga maging madinaeag-on ro paglunsar it tatlong adlaw nga Bayanihan, Bakunahan National COVID-19 Vaccination Days.
Nasayuran nga target it gobyerno nga mabakuhan ro 70 porsyento it kabilugan nga populasyon it nasyon para maabot ro herd immunity sa mas madali nga tyempo rason nga ginpadasigan eon ro pag-rolyo it bakuna.
Mag-eowas sa makatao it dugang nga proteksyon sa kaugalingon ag pamilya, makabulig man ro COVID-19 vaccine para malikawan ro pag-angkon it severe infection eabi pa ag may bag-o eoman nga nadiskubreng B.1.1.529 ukon ginatawag nga Omicron variant halin sa South Africa.
