KALIBO, Aklan—Nag-umpisa eun ro Bayanihan Bakunahan activity sa bilog nga probinsya it Aklan.
Suno kay Jay Lorence Dionesio it Provincial Health Office ukon PHO-Aklan nga makarun nga adlaw it lunes hay promal eun nga nagbukas ro nasambitan nga aktibidad sa probinsya.
May kaangtanan kara kapin sa 100 ka mga nursing students ag iba pang volunteer kaibahan ro andang mga instructors ag staff maghalin sa DOH Aklan ro nagpartisipar sa nasambit nga aktibidad nga nakataeanang magatapos sa petsa 1 it Disyembre it presenteng dag-on.
Raya nga tikang hay bilang sabat man it probinsya sa National Vaccination Days ukon Bayanihan Bakunahan campaign.
Tuyo kara nga pabaskugon pa ro kampanya it gobyerno para sa bakuna kontra covid-19.
Kabulig it probinsiya ro mga nursing schools, Info Tech colleges, Sangguniang Kabataan, youth groups ag govt agencies kapareho it BFP, DepEd ag hospitals.
Ro mga volunteer hay nagpaidaeum man sa orientation it PHO-Aklan ag DOH.
Nasayuran nga ro ginatao nga bakuna sa mga naga edad 18 pataas hay AstraZeneca samtang ro mga pedia ukon naga edad 12 anyos hasta 17 hay Pfizer.
