Ginpaiway ro nakataeana nga nationwide simultaneous active shooter ukon active-threat drill sa mga pampubliko ag pribadong eskwelahan sa bilog nga nasyon nga igapatigayon kunta hin-aga nga adlaw it Martes, Agosto 25.
Suno kay Department of Education ukon DepEd region VI spokesperson Hernani Escullar Jr., nakabaton sanda it abiso halin sa central office nga kanselado ro aktibidad makaron nga adlaw ag gintaeana eon lang raya sa buean it Setyembre.
Apang sa andang bahin suno kana hay preparado ro tanan nga eskwelahan sa Western Visayas sa nasambit nga active-threat drill.
Nasayuran nga ro nasambit nga nationwide simultaneous drill hay unang gin-anunsyo it DepEd sa pagpamati sa Senado, kon sa siin ginpaathag ni DepEd Undersecretary Malcolm Garma nga tuyo kara nga testingan ro kahauman, pagbakwit ag proseso it ‘reunification’ it mga estudyante ag andang mga ginikanan engkasong makaangkon it paeag ukon kinagamo sa sueod it mga eskwelahan.
Ginkriar ro mga safety protocol kabulig ro Philippine National Police (PNP) ag ro Department of the Interior and Local Government (DILG) kasunod it mga naireport nga insidente it pagpamaril ag kinagamo sa mga kampus ko kan-o eamang partikular sa Tacloban City ag Zamboanga City.
