Nag-arangkada eon ro nationwide supplemental immunization campaign para mabakunahan ro mga onga kontra sa tigdas, rubella, ag polio sa bilog nga probinsya it Aklan.
Raya hay kasunod it provincial lauching nga ginpatigayon sa covered court it banwa it Numancia nga gin-atenderan it opisyal it Department of Health region VI ag mga opisyales it Aklan.
Sa naging mensahe ni Aklan governor Joen Miraflores, kinahang-ean nga maabot ro target percentage nga 95% nga mabakunahan ro mga inonga agud nga makalikaw sa mga napapanahong sakit.
Pinaagi sigon kara hay malikawan nga may mamamatay nga mga inonga bangud sa sakit nga tigdas, rubella ag polio.
Igabutang sigon ro mga vaccination sites sa madali maaccess it publiko partikular sa mga mall nga masaming ginapamasyaran makaron it publiko bangud sa tuman nga kainit.
Nauna eon nga ginpaathag it Aklan Provincial Health Office ro importansya it “Chikiting Ligtas 2023” kon sa siin tuyo kara nga protektahan ro mga inonga halin sa vaccine-preventable diseases.
Target nga mabakunahan ro mga una sa 9 hasta 59 months old kontra sa measles, samtang zero hasta 59 months old mat-a ro pagabakunahan sa polio.
Kinahang-ean nga mataw-an it access sa life-saving vaccines ro mga inonga sa nasambit nga edad agud nga malikawan ro mga nasambit nga sakit nga posibleng makata-o it malala nga infection sa eawas it onga.
