KALIBO, Aklan–Natumod eon it mga otoridad ro mga indibidwal nga eakot sa rambol sa sangka baylehan sa sueod it barangay pavement it Pagsanghan, Banga ko aga-aga it Miyerkoles.
Suno kay Punong Barangay Florido Rubrico nga sa pihak nga may natumod eon nga mga biktima ag suspek hay owa pa sigon it may nagdangop sa anang taeatapan agud nga magpasaka it reklamo ukon makaangkon it aregluhan.
Ginasugid nga nag-umpisa ro gulo kat gina-alegar nga ginbayo si alyas “Ngongo” ag gintabangan eamang it biktimang si Michael Saradolla.
Kasunod kara, nag-eueupad eon ro mga bote ag may gin-eampusan it butong.
Sambilog sa mga biktima hay padayun nga gina-obserbahan sa intensive care unit it Aklan provincial hospital ag nakataeanang igapaidaeum sa operasyon matapos nga eampusan it bote sa ueo.
Sangka baeay man sigon nga maeapit sa pavement ro nakaangkon it kasamaran partikular sa anang bintana ag kurae.
Gina-alegar nga ro rambol hay sa tunga it pila ka mga binatilyo nga taga-minuro ag mga taga slaughter house.
Samtang, aminado man si kapitan Rubrico nga hasta eamang it alas-12 it tungang gabi-i ro andang permit, apang humirit pa sigon ro anang sangka barangay kagawad nga imaw ro chairman it committee on peace and order rason nga na-extend ro binayle hasta nga nauli sa kinagamo tuga it maabu eon nga hilong.
