Ginpaguwa it National Bureau of Investigation (NBI) ro surveillance footage sa ginpatigayon nga entrapment operation kontra sa Social media personality ag Peanut Gallery Media Network (PGMN) founder Franco Mabanta nga gina-alegar nga nag-extort it P350 million halin kay former Speaker Martin Romualdez.
Sa nasambit nga footage nga ginpaguwa it NBI Organized and Transnational Crimes Division (OTCD), makita si Mabanta nga nakikipag-istorya sa sangka undercover agent it NBI nga nagpakuno-kuno nga tawuhan ni Romualdez.
Gindaea it NBI agent ro sangka duffle bag nga may sueod nga kwarta sa sangka hotel sa Makati apang nagpamalibad raya nga batunon ag ginhambaean sanda nga daehon raya sa sangka country club sa Pasig ag itau sa daywang eaeaki nga naka-face mask.
Pag-abot sa country club, gintau it NBI undercover agents ro tatlong maleta ag sangka duffel bag sa mga eaeaki nga naka-face mask.
Nakasueod sa mga maleta ag bag ro P75 milyon nga gina-alegar nga gina-extort kay Romualdez. Gindaea it daywang eaeaki nga nakasuksok it face mask ro mga maleta ag bag sa sueod it country club ag gindaea sanda sa sangka kwarto kun sa siin idtu si Mabanta.
Matapos makabaton it signal, ginsueod it NBI ro function room nga ginarentahan it mga suspek ag gindakop si Mabanta.
Nauna eon nga ginpamalibaran ni Mabanta nga eakot imaw sa pagpangilkil sa dating House Speaker.
Courtesy of NBI OTCD
