KALIBO, Aklan—Ginausisa eon makaron it lokal nga gobyerno it Malay, Aklan ro kabilugang epekto it 2019 Novel-Coronavirus Acute Respiratory Disease (nCoV-ARD) sa isla it Boracay.
Suno kay Malay Acting Mayor Frolibar Bautista, mabahoe sigon ro gin-naba it tourist arrival sa nasambitang isla halin kat nag-eopok ro isyu sa nakakamatay nga respiratory virus kon sa siin, may tatlong kumpirmadong kaso eon ro Pilipinas ag sambilog kara ro namatay.
Sa kamatuoran sigon hay sarado eon ro pilang chinese establishments bangud sa gulpihang pagkaduea it andang mga parokyano halin kat ginpatuman ro suspension sa international flights halin sa maabong probinsya sa China.
Aminado ro alkalde nga sambilog ro mga Chinese tourist nga nagabuhi sa sektor it turismo sa banwa ag sa isla kon sa siin, gindomina it mga raya ro haeos 50 porsiyento it 434,175 nga dumueoong turista nga nagsueod sa Boracay ko nagtaliwan nga dag-on.
Sa pihak, nagapasaeamat gihapon ro alkalde bangud padayon ro pag-aeabutan it mga Koreans ag iba pang nationalities agud magbakasyon sa sikat nga isla.
Ginlaygayan man nana ro mga raya nga magsuksok it surgical mask, ipabiling malimpyo sa eawas, maggamit it alcohol agud makalikawa sa respiratory virus maskin nagapabilin nga n-cov free ro bilog nga probinsya.
