KALIBO, Aklan — Gina-imbestigahan eon it kapulisan ro nagapakalhit it pekeng 1,000 peso bills nga ginagamit nga pangbakae sa mga baraka ag iba pang baealigyaan sa probinsiya it Aklan.
Raya hay kasunod it pag-umpisa it Ati-Atihan fever sa probinsiya.
Mag-eowas sa manugbaligya it euy-a, sangka tag-ana it sari-sari store ro nakataeupangod nga peke man ro daywang sang libong pisong papel nga ginbayad kana it motorcycle-riding suspects.
Sa interview it Bombo Radyo, ginpahayag ni Mary Joy Montuya, residente it Sitio Caeog-a, Brgy. Cabugao, Batan nga samtang nagapanilhig sa guwa it anang baraka sa kilid it national highway bandang alas-6 it agahon it Martes, Enero 13 kat nagpundo ro daywang ka eaeaki nga nakasakay sa motorsiklo ag nagbakae it sigarilyo ro backrider gamit ro sang libong piso.
Sa owa nagbuhay hay nagpanaog man ro driver it motor ag nagbakae it daywang lata it corn beef gamit man ro sang libong piso.
Ro mga suspek suno kana hay parehong mga mabahoe it eawas ag mga Ilonggo speaking kamana man nga nakasuksok it jacket ag full faced helmet rason nga owa nana raya naitsurahan.
Sa pag-review sa CCTV footage, ro mga suspek hay halin sa banwa it Kalibo ag paagto sa direksyon it Altavas .
Naka-eampas eon sigon ro mga raya sa anang baraka ag uman nga nagbalik ag nagbakae.
Nataeupangdan man nana nga samtang nagasinsilyo hay matsa gina-disturbo imaw it mga suspek.
Ulihi eon sigon nana napan-uhan nga puro peke ro ginbayad kana nga tig-sang libong peso.
Ginhana pa sigon nanda nga eagson ro mga suspek apang owa eon naabutan.
Ro nabiktima it fake money nga si Mary Joy Montuya
