KALIBO, Aklan–Nagapati ro sangka batikan nga abogado sa probinsya it Aklan nga mas mayad gihapon kung magbalik eon sa nasyon si Negros Oriental 3rd District Representative Arnie Teves ag atubangon ro mga alegasyon nga ginahaboy kontra kana angot sa assassination kay Governor Roel Degamo ag pagkadaeahig it waeong iba pa sa andang residensya sa banwa it Pamplona ko Marso 4.
Suno kay Atty. Axel Gonzales, nagakadapat eamang nga sabton it kongresista ro mga alegasyon agud nga mabatian ro anang bersyon sa oras nga matapos eon ro anang gindihon nga medical leave.
Matueopangdan nga si Congressman Teves ro ginaturo nga mastermind it mga nadakpan nga suspek sa pagpatay kay Governor Degamo.
Kung siin, daywa sa mga raya hay una sa idaeom it witness protection program it gobyerno.
Apang, raya sigon tanan hay puro alegasyon eamang ag kinahang-ean pa nga mapamatud-an sa korte.
Ko kan-o eamang hay nagpatigayun it operasyon ro mga otoridad sa sambilog sa mga propiedad ni Teves kung siin may narekober sanda nga mga high powered firearms.
