KALIBO, Aklan–Naputos it kasubo ro bilog nga Negros Oriental matapos ro karumal-dumal nga pagpamaril-patay kay Governor Roel Degamo sa mismong panimaeay kara sa Sitio Nuebe, Brgy. San Isidro, Pamplona.
Suno kay Bombo News Correspondent Elna Mariño nga pasado alas-11:00 kainang agahon kat ginkumpirma nga binawian eon it hueam nga kabuhi ro gobernador kaibahan ro limang ka mga bodyguard kara ag waeong sibilyan.
Base sa inisyal nga impormasyon, an-om nga mga kaeaeakin-an nga nakasuksok it uniporme it soldado ag armado it high powered firearms ro umatake sa compound it gobernador.
Madinaeag-on man nga naaresto it mga otoridad ro tatlong ka mga suspek nga sanday Joric Labrador, 50-anyos, dating soldado ag residente it Cagayan De Oro; Joven Aber, 42-anyos, dating army ranger ag residente it Brgy. Robles, La Castellana, Negros Occidental ag Benjie Rodriguez, 45-anyos, tumandok it Mindanao.//Raya hay kasunod it ginpatigayun nga joint hot pursuit operation it Bayawan City Police Station, Philippine Army ag Special Action Force.
Samtang, ro daywang ka mga saeakyan nga ginapatihan nga gingamit nga getaway vehicles it mga suspek hay narekober sa Brgy. Kansumalig, Bayawan City, Negros Oriental.
Sa makaron hay nagapadayun pa ro imbestigasyon it mga otoridad matapos ro insidente.
