Kalibo Aklan ——Nagapabilin nga lockdown ro bilog nga nasyon it Nepal nga nag-umpisa pa ko March 13, 2020.
Suno kay Bombo International Correspondent Starlight Saavedra, sangka missionary sa lugar nga ro mga tawo nga nagsueod sa nasyon antes ro lockdown partikular ro halin sa India, Qatar, Saudi Arabia ag iba pang kaeapit nga nasyon hay insigidang ginbutang sa quarantine facility agud nga indi magkalhit ro coronavirus disease (COVID-19).
Strikto sigon nga ginapatuman it mga kapulisan ro polisiya it gobyerno kon sa siin ro madakpan nga magaeabag hay paga-imponeran it multa nga 5,000 Rupee ukon katumbas it 2,500 pesos.
Hugot man sigon nga ginapatuman ro physical distancing ag ro pagpabilin sa tagsa ka panimaeay partikular kon uwa it importante panaw bangud nga ro solomenteng bukas nga establisyimento hay ro supermarkets ag pharmacy.
Ginpahayag dugang ni Saavedra nga maabong bulig ro nagaabot sa Nepal halin sa mga maeagkuan nga nasyon partikular pag-abot sa personal hygiene ag pagkaon.
Sa kabilugan, ro Nepal hay nakalista eamang it 59 nga kaso it COVID-19 kon sa siin 16 pa eamang kara ro nagmayad ag uwa pa it nailistang namatay.
