KALIBO, Aklan—Ginpaathag it sangka Aklanon national athlete nga mabahoe nga bulig ro pag-angkon it homecourt advantage sa pagsabak sa anuman nga International competition.
Raya ro naging pahayag ni Aklanon beauty queen turned pencak selat national athlete Cherry Mae Regalado kasunod it pag-angkon it silver medal it anang maeapit nga amiga nga si Nesthy Petecio sa 2020 Tokyo Olympics matapos nga maisog nga nakipagbakbakan kay Sena Irie it Japan sa women’s featherweight final pinaagi sa unanimous decision.
Suno kay Regalado nga ro home court advantage hay magapabaskog it chansa nga magpangibabaw sa kompetisyon.
Aminado imaw nga naging close fight ag impresibo ro ginpakita nga performance it daywa, apang ro desisyon hay pumabor sa Japanese boxer.
Gindugang pa kara nga maskin nga liyamado si Nesthy sa 2nd round hay gintaw-an sa gihapon it highlight ro anang kaengkwentru rason nga dikara makita kon ano ro mahimo it sangka host country.
Sa pangkabilugan, saludo ag gindayaw kara si Nesthy sa ginpakita nga laban para sa maka-uli it medalya ag makatau it dungog sa nasyon.
