KALIBO, Aklan–May tatlo pang nabilin nga aktibong kaso it Coronavirus Disease 2019 ukon COVID-19 ro banwa it New Washington.
Daywa sa mga pasyente ro presenteng naka-isolate sa Ligtas COVID Center it banwa samtang sambilog ro admitted sa COVID ward it Aklan Provincial Hospital.
Suno kay New Washington Municipal Health Officer Dr. Daystar Sedillo, nakalista sanda it kabilugan nga 33 nga mga tinamaan it deadly virus kun sa siin naka-recover eon ro 30 sa mga raya.
Ro tatlong nabilin nga aktibong kaso sigon hay puro asymptomatic ukon owa it ginapakita nga anumang sintomas kamana man nga hugot nanda rayang gina-monitor.
Sa ginpatigayun nga contact tracing, 13 sigon ka mga indibidwal ro andang natumod nga high risk contact it mga nagpositibo.
Ginpaidaeom eon man sigon ro mga raya sa RT-PCR test ag ginahueat eon lang ro resulta it swab test.
Ginpasiguro man ni Dr. Sedillo nga kontrolado eon nanda ro sitwasyon rason nga owa eon it dapat ikabaeaka ro mga pumueoyo.
Samtang, gina-engganyo gihapon kara ro anang mga kasimanwa nga padayun nga sundon ro minimum health protocols para malikawan ro pagkalhit pa it COVID-19 infection.
