KALIBO, Aklan–Nagpasalig ro lokal nga gobyerno it New Washington angot sa ginpromisang pagbakae it bag-ong garbage truck nga pagagamiton sa paghakot it basura sa pabaeay it national housing authority sa barangay jugas sa nasambit nga banwa.
Suno kay new Washington mayor Jessica Panambo nga haum eon sanda sa pagpatigayon it bidding process sa pagbakae it daywang garbage truck kun sa siin may nakataeana eon nga pondo para kara sa idaeum it 2023 annual budget.
Aminado man si Panambo nga antes nga pormal nga nagpungko bilang alkalde hay nagpatigayon imaw it courtesy call sa tanan nga mga punong barangay it banwa agud nga masayuran ro andang natungdan nga mga problema.
Sambilog ro problema sa basura sa pabaeay ro ginpaabot kana pinaagi kay kapitan Thelma Pronton.
Apang bukon imaw it pabor nga padayunon ro pamaagi sa paghakot it basura it dating administrasyon bangud nga natukiban nga ro ginagamit nanda nga saeakyan sa garbage collection hay ro rescue vehicle it munisipyo nga nauna eon nga gin-kwestiyon it commission on audit ukon COA.
Ginpahayag dugang nga may garbage contractor nga partner ro LGU para sa paghakot it basura sa mga coastal barangay , kun sa siin sa anang pagpungko hay ginpaeawig pa kara ro andang serbisyo ag gin-eakip ro garbage collection sa mga interior barangays.
Nasayuran nga raya ro unang kahigayunan nga magabakae it garbage truck ro munisipyo.
Mag-eowas sa problema sa basura sa pabaeay it NHA, pagatutukan man ro pagpa-obra it drainage system agud nga malikawan ro pagbaha sa lugar.
Kapin sa 5-milyon pesos sigon ro gintaeana nga pondo para sa proyekto it department of the interior and local government ukon DILG.
