KALIBO, Aklan—Ginduea ni New Washington Mayor Jessica Panambo ro kabaeaka it mga pumueoyo sa lugar nga gin-eontaran it oil spill sa Brgy. Polo sa nasambit nga banwa kasunod it ginpatigayon nga ocular inspection.
Kaibahan it alkalde nga nag-usisa sa lugar ro Bureau of Fisheries and Aquatic Resources, Municipal Agriculture Office, Municipal Environment and Natural Resources, PNP personnel it New Washington Municipal Police Station ag Philippine Coastguard.
Nadiskubrehan it mga raya nga ro oil spill hay naghalin sa nagleak nga lube oil sa ginabreak nga power barge sa yard it Metallica Shipbuilding/Breaking Company.
Nag-apela ro alkalde sa mga fisherfolks ag taeabahan growers nga maeapit sa area nga inde magkabaeaka bangud sa initial nga resulta it andang pag inspection hay na-contained eon man ro oil ag nagapadayon ro siphoning nga ginapatigayon it shipyard company sa bulig it Philippine Coastguard.
Samtang, padayon nga ginamonitor it lokal nga gobyerno it New Washington sa pagpanguna it Office of the Municipal Agriculture ag Municipal Environment and Natural Resources ro nasambit nga insidente.
