KALIBO, Aklan—Nakataeanang magadihon it andang natungdan nga certificates of candidacy ukon COCs ro team ni New Washington Mayor Shimonette Peralta-Francisco sa Oktubre 7.
Raya ro ginkumpirma ni Mayor Shimonette sa Bombo Radyo Kalibo.
Suno kana nga nagkasugot ro tanan nana nga slate nga dueueungan nga maga-file it COC sa huwebes nga adlaw.
Matapos sigon it alas-6 sa agahon nga misa hay magapatigayon anay sanda it meeting bandang alas-7 antes nga magaderetso bandang alas-8 Aklan State University cafeteria nga gintaeana it Commission on Elections ukon Comelec-New Washington agud nga personal nga magadihon it andang natungdan nga COCs.
Kadungan kara, ginpangaeanan it alkalde ro anang vice mayor nga si Engr. Kristian venus peralta kaibahan ro anang slate sa sangguniang bayan sa idaeum it “team one new Washington”.
Lima sigon sa mga raya hay incumbent nga ginaeakipan nanday Estrella Velarde, Marlon Pilante, Lollybe leyson, Nereo Fernandez ag Janeth Carpio.
Bangud nga ro daywa hay magatapos eon ro termino, pagabayluhan ro mga raya it nag-ober-da-bakod sa andang partido nga sanday junie repiano ag diosilio malonosan.
Magiging kaibahan man sigon nanda ro magabalik sa konseho nga si Janeth Dela Cruz.
