NEW WASHINGTON, Aklan—Ginpasiguro it New Washington Municipal Police Station nga pabaskugon pa gid nanda ro police visibility ag pagpatrolya bukon eamang it sa Poblacion kundi maging sa mga interior barangay it banwa it New Washington.
Raya hay kasunod it pagkamatay it sangka ginang matapos nga aksidenteng makuryente sa anda mismong gin-install nga live wire sa kurae agud nga uwa it makasueod nga manakaw sa andang tangke sa Sitio Casoeman, Brgy. Lawaan it nasambit nga banwa.
Suno kay PLt. Theresa Grace Reynaldo, deputy chief of police it New Washington PNP Station, antes nga maghimo it desisyon ag tikang nga peligroso, kinahang-ean nga pag-isipan it mayad bangud sa may iba pang pamaagi agud nga maproteksyunan ro propyedad ag pangabuhian.
Makabig nga delikado ro pagbutang it live wire bangud sa posibilidad nga ikamatay raya it tawo.
Bukon man suno kana it advisable ro pagbutang it makaraya nga klase it proteksyon.
Madumduman nga naabutan eon lang it tanod ro anang asawa nga uwa eon it kabuhi ag nagatiskog eon matapos nga makuryente.
