KALIBO, Aklan—Uman nga nakalista it tatlong panibag-ong kaso it Coronavirus Disease 2019 ukon COVID-19 ro banwa it New Washington.
Suno kay Municipal Healh Officer Dr. Daystar Sedillo it Municipal health Office ukon MHO-New washington nga ro mga nasambitan nga pasyente hay nakaangkon it close contact sa mga nauna eun nga nagpositibo sa makamaeatay nga virus.
Bangud kara, nag-abot eun sa 18 ro nailistang aktibong kaso it COVID-19 sa nasambitan nga banwa.
Samtang may una man nga 66 nga kabilugang kaso ag 1 nga namatay.
Samtang, ginpahayag man ni Municipal Healh Officer Dr. Daystar Sedillo it Municipal health Office ukon MHO-New washington nga umpisa makarun nga adlaw hay magapatigayon it ika-ap-at nga vaccination roll out ro banwa it New washington.
Kapin sa 240 vaccines ro nakataeana nga igaturok sa mga senior citizens ag mga nabilin pang frontliners nga owa sa gihapon nakabatun it andang first dose it COVID-19 vaccine.
Samtang, ginpabugae man kara nga sa kabilugang 455 nga mga frontliners sa banwa hay 356 eun ro natigayon nga mabakunahan.
Dugang pa kara nga sa makarun hay haeos amat-amat nga nagataas ro numero it mga pomoeuyo nga gustong magpabakuna matapos sandang magbisita sa kada barangay agud nga magpaabot it impormasyon angot sa importansya it bakuna kontra sa covid-19.
