KALIBO, Aklan—Blangko sigon si New Washington Sangguniang Bayan member Rolly Equiña angot sa kung anong kaso ro ginpasaka kontra kana sa Office of the Ombudsman ag ko ulihi hay ginbalik man sa Sangguniang Panlalawigan it Aklan.
Suno kay Equiña nga nag-umpisa ro mga reklamo angot sa nagtuhaw nga fake news may kaangtanan sa COVID-19 sa andang banwa.
Bangud sa owa pagka-ilintindihan rason nga nag-abot sigon sanda it kaparehong mga Sangguniang Bayan member sa pagpasaka it kaso.
Dugang pa ni Equiña nga nauna eon nga gin-dismiss it Aklan Prosecutors Office ro kaso nga ginhaboy kana.
Apang, owa sigon imaw it ideya sa kaso nga ginpaabot sa Ombudsman bangud owa imaw it nabaton nga maskin ano mang dokumento angot kara.
Sa pihak nga parte, ginklaro man ni Equiña nga magapabilin imaw bilang Sangguniang Bayan member agud nga taw-an it daean ro kandidatura bilang alkalde ni dating New Washington SB member Jessica Panambo.
Madumduman nga naging matunog ro pangaean kato ni Equiña nga magkandidato bilang alkalde it New Washington sa maabot nga eleksyon 2022 sa idaeom it partidong tibyog Akean.
