KALIBO, Aklan—Gintuldukan eon New Washington Sangguniang Bayan member Rolly Equiña ro mga espekulasyong maga-kandidato imaw bilang alkalde it nasambit nga banwa sa maabot nga eleksyon.
Suno kana nga kasado eon ro andang plano sa idaeum it partidong Tibyog , kun sa siin ro negosyanteng si Jessica Panambo ro andang pambato sa pagka-mayor, ka-tandem si Molot Quimpo bilang vice mayor ag kaibahan imaw sa waeo nga konsehal it banwa.
Makabangga ni Panambo si incumbent mayor Shimonette Peralta-Francisco nga nauna eon nga nag-ober-da-bakod sa grupo ni dating kalibo mayor William Lachica.
Gindugang pa ni Equina nga posibleng namalisyahan it ibang tawo ro anang mga ginaduso nga proyekto ag programa makaron sa mga kabarangayan rason nga nagtuhaw ro pagpati nga posibleng magapadaeagan man imaw nga mayor ag makaangkon it three-corner-fight sa nasambit nga banwa.
