KALIBO, Aklan—Nagdeklara it national state of emergency ro New Zealand sa ikatlong kahigayunan sa kasaysayan kasunod it pagpanaeasa it bagyong Gabrielle partikular sa nasidlangan nga parte it nasambit nga nasyon.
Suno kay Bombo International Correspondent John Riel Fernandez it New Zealand nga ro bagyo hay may daea nga mabaskog nga hangin ag uean rason nga nakaangkon it kasamaran sa power ag communication lines.
Maskin nga naghubas eon ro tubi-baha, apang may pilang lugar ro indi pa masueod bangud sa mga landslides.
Kapin sa 10,000 nga mga residente ro gin-evacuate bangud sa maeapnagon nga pagbaha.
Gindugang pa ni Fernandez nga eubus nga naapektuhan it bagyo ro ginakabig nga “fruit basket” it nasyon, kun sa siin makita ro maabu nga mga pananum.
Madumduman nga ko nagtaliwan nga buean, ro Auckland ag kaiping nga mga lugar hay tinamaan man it record breaking nga bubu it uean nga nagresulta sa grabeng pagbaha nga ginkamatay it ap-at nga katawo.
