KALIBO, Aklan — Nabiktima it kapin sa P20,000 nga balor it load ro provincial manager it National Food Authority (NFA)-Aklan it miyembro it budol-budol gang.
Sa interview it Bombo Radyo kay Josephine Castillo, nakabaton sigon imaw it tawag halin sa nagpakilaeang Henry Tristeza, ro andang NFA regional manager.
Ginmanduan sigon imaw it nagpakilaeang opisyal nga magpa-book sa sangka restaurant nga naga-serve it seafoods para sa 20 katawo.
Mag-eowas kara, ginhinyo pa sigon kana it suspek nga bake-an it load ro 20 katawo ag i-send kana ro pin it mga raya.
Emergency sigon ro andang pagpadueong sa Aklan para sa sangka event.
Ulihi eon kat masayuran ni Castillo nga nagaabot sa 40 load cards ro nabakae it anang ginmanduang staff matapos nga magtawag pa sigon raya para sa dugang nga load.
Kat magduda hay nagtawag imaw sa sangka matag-as nga opisyal it NFA region 6 ag dikara nadiskubrehang uwa it transaksyon ro andang director sa probinsya it Aklan.
Nasayuran nga nabiktima man it kaparehong scam ro NFA-Capiz ko nagtaliwan nga mga inadlaw.
Ginpahayag pa ni Castillo nga nagtao imaw it kumpiyansa bangud ro numerong ginamit it suspek hay ro numerong gintao man it andang regional office kana.
