KALIBO, Aklan—Mas pang ginpabaskog it National Food Authority (NFA) ro andang palay procurement operations sa probinsiya it Aklan sa atubang it haeos patapos eon nga harvest makaron nga tiempo it summer.
Suno kay Glenda Paz, head it National Food Authority (NFA)-Aklan and Capiz nga hasta Abril 7, 2021 hay nakabakae eon ro ahensiya it 15,375 bags it paeay nga naga-abot sa kapin sa 14 milyon pesos.
Raya hay sa pihak it ginapangatubang nga COVID-19 pandemic.
Ginpasiguro man ni Paz nga nagapabilin nga bukas ro andang mga bodega ukon grain centers agud nga magbaton it palay deliveries halin sa mga mangunguma.
Ginpaathag pa kara nga ro target nanda nga mabakae nga paeay sa aklan makaron nga dag-on 2021 hay 105,200 bags.
Angot kara, nag apela imaw it bulig sa mga mangunguma nga ibaligya kanda ro andang mga paeay agud nga masiguro ro food security.
Ro buffer stock sigon it bugas nga kaeabanan nga ginabaligya para sa calamities and emergencies eabi eon makaron para sa COVID-19 relief operations hay puro naghalin sa local farmers ag owa eon it imported bangud sa bag-ong mandato it ahensiya.
Nagapadayun man suno kana ro andang mobile procurement sa bilog nga probinsiya agud nga indi eon mabudlayan ro mga maintok nga mga mangunguma.
Samtang, nagapabilin sigon sa 19 pesos kada kilo ro andang pamakae it paeay.
