KALIBO, Aklan—Padayun sa gihapon ro pagpamakae it National Food Authority ukon NFA it mga paeay it mga mangunguma sa probinsiya it Aklan.
Raya ro ginpahayag ni Mr. Andy Ostan it NFA Capiz branch.
Suno kana nga mag-eowas nga bukas ro andang aklan grains center sa barangay linabuan norte banga lunes hasta it sabado hay may anda man nga mobile procurement nga nagalibot sa mga kabarangayan sa nagkaeain-eain nga banwa sa Aklan.
Gindugang pa ni Ostan nga nagapabilin nga 19 pesos pesos kada kilo ro andang pamakae it paeay nga mas mataas kaysa sa mga pribadong traders nga 17 pesos kada kilo.
Bangud nga limitado sigon ro andang dryer, dapat nga malimpyo ag uga ro paeay nga igabaligya sa andang taeatapan.
Ro mga walk-in farmers hay pwedeng makabaligya it hasta sa 40 nga bags.
Makaron nga buean it Setyembre, ginpahayag ni ostan nga kapin sa 10,000 bags pa eamang it paeay ro andang ginpamakae sa aklan ukon 1,200 bags kada adlaw.
Angot kara, padayun nana nga gina engganyo ro mga mangunguma nga magbaligya it paeay para sa food security it probinsiya.
Ro Aklan suno kana hay rice sufficient province kun sa siin ko 2020 hay nakaangkon it surplus ukon nagsobra ro harvest.
Ginpahayag pa ni Ostan nga owa eon sanda makaron it accredited retailers sa kada banwa bangud nga prayoridad nanda nga baligyaan it bugas ro mga LGUs ag iba pang ahensiya it gobyerno eabi eon sa tiempo it kalamidad kapareho makaron nga may COVID 19 pandemic.
