Uwa it direktang epekto sa National Grid Corporation of the Philippines (NGCP) operation ro padayon nga pagtaas it presyo it produktong petrolyo tuga it nagapadayon nga kinagamo sa Middle East.
Raya ro ginpahayag ni Atty. Cynthia Alabanza, tagapaghambae it nasambit nga taeatapan sa ginpatigayon nga press conference kahapon, Marso 19.
Suno kana, bangud nga bukon it oil reliant ro andang serbisyo ukon ro power delivery, makit-an eamang ro epekto sa suplay ukon sa generation. Buot hambaeon, posibleng maghueag ro presyo sa merkado it kuryente apang ro nagabakae kara hay ro kooperatiba.
Pag-klaro nana, nga mas mayad nga ro mismong Department of Energy (DOE) ro magpaathag bangud nga sanda ro may buyot it overview it sitwasyon.
Samtang sa pihak nga parte, ginpaathag man ni Atty. Alabanza nga sa paaeabuton nga tag-init, masami nga nakakabatyag it pag-nipis it suplay it kuryente. Mabahoe sigon ro nagiging epekto it temperatura sa suplay pati eon man sa demand.
Dugang pa nana, sa pihak nga may mga magasueod nga bag-ong planta para mag-tao it suplay sa taeatapan, sambilog sa andang nakikitang problema hay ro pagsueod it maabong solar nga makabig nga medjo alagaon.
Mageuwas kara, may mga hangkat pa nga paga-atubadngon ro NGCP para nga ma-manage ro suplay it kuryente.
