KALIBO, Aklan — Ginpasalig it National Grid Corporation of the Philippines (NGCP) nga makompleto nanda makaron nga dag-on ro daywang nagapangunang transmission projects sa Aklan partikular sa Isla it Boracay.
Suno kay Sangguniang Panlalawigan member Apolinar Cleope nga ro andang ginatutukan hay ro pagkompleto sa 69 KV transmission line nga ginasugid nga matapos makaron nga unang domingo it Pebrero agud nga makaangkon it tayuyon nga supply it kuryente sa Boracay sa peak season sa summer kun sa siin ginaeauman kara ro pagdagsa it mga turista.
Madumduman nga nasamad ro nasambit nga linya nga nahamtang maeapit sa runway it Caticlan airport matapos nga soe-ubon it tubi ro andang underground cable.
Apang ro 69 KV transmission line hay temporaryo eamang nga solusyon, ag ro pinaka-importante hay ro completion it 138-KV Nabas-Caticlan Boracay transmission line.
Ginpahayag ni Cleope nga nagtau eon it go signal ro Energy Regulatory Commission (ERC) sa NGCP agud nga tapuson ro construction kara.
Tuyo it proyekto nga maka-reinforce sa grid ag matigayon nga maayos ro naga-eksister nga pasilidad agud nga masuportahan ro nagatinaas nga power requirements it Boracay.
Ginpasugtan sigon it ERC ro hinyu it NGCP nga maka-angkon it extension ro pagtapos it proyekto it hasta sa buean it Agosto.
Raya hay bangud nga maskin na naiplastar eon ro andang submarine cable hay owa pa nahuman ro andang substation sa lugar.
