KALIBO, Aklan — Ginapaidaeum it National Grid Corporation of the Philippines ro Visayas grid sa parehong red ag yellow alert bangud sa padayun nga kakueangan sa suplay it kuryente ag mataas nga demand sa tunga it mainit nga tiempo.
Suno kay Reagahn Alcantara, spokesperson it NGCP Visayas nga ginapatuman ro red alert sa Visayas umpisa alas-5 it hapon hasta alas-9 it gabi-i samtang ro yellow alert mat’a hay antes ag pagkatapos it peak hours ukon alas-2 it hapon hasta alas-5 it hapon ag alas-9 it gabi-i hasta alas-11 it gabi-i.
Ginpaathag ni Alcantara nga ro red alert ro pinakamataas nga lebel it paandam nga nagakahueugan nga bukon it bastante ro suplay agud nga masabat ro demand, butang na ginakinahangean ro rotational brownouts.
Sa pihak nga parte, ro yellow alert hay indikasyon nga manipis eon ro reserbang kuryente ag posibleng indi masarangan ro gulpiyadang pagkaduea it suplay.
Kaibahan sigon sa nagapangunang dahilan it pagtaas it alert level hay ro dueueungan nga forced outage it pilang planta ag pagnaba it kapasidad it iba pa, nga nagaresulta sa kakueangan it available power sa grid.
Posibleng umabot sigon sa pilang oras ro brownout sa nagkaeain-eain nga parte it Visayas samtang ginasabat ro kakueangan sa suplay ag gina-ayos ro mga planta.
Sa pihak nga parte, gin engganyo ni Alcantara ro publiko ag mga mabahoe nga consumer nga magtipid sa paggamit it kuryente, eabi eon sa peak hours, agud nga malikawan ro mas maeapnagon nga power interruption sa rehiyon.
