KALIBO, Aklan — Nagpadumdum ro National Grid Corporation of the Philippines sa publiko nga likawan nga magpaeupad it mga bulador maeapit sa mga poste ag linya it kuryente agud nga malikawan ro aberya sa suplay it kuryente.
Sa interview it Bombo Radyo Kalibo, ginpahayag ni Reagahn Alcantara, spokesperson it NGCP Visayas, may mga nailistang insidente kun sa siin nagsab-it ro mga bulador sa transmission lines, nga nagatuga it power interruptions ag posibleng kahalitan sa mga pasilidad it kuryente.
Ginpamilit pa it grid operator nga delikado man raya sa kaeowasan it publiko, eabi eon kon ro bulador hay may metallic ukon basa nga higot nga pwedeng magtuga it kuryente ukon pagkakuryente.
Angot kara, gin engganyo it NGCP ro mga ginikanan nga bantayan ro andang mga unga ag siguraduhon nga sa eowas nga lugar eamang magpaeupad it bulador nga maeayo sa mga linya it kuryente ag poste.
Padayun man nga nagapadumdum ro ahensya nga ro simpleng pag-dahan hay makabulig agud nga malikawan ro brownout ag mapabilin ro maayos nga daeagan it kuryente sa nagkaeain-eain nga lugar.
