Nakaangkon it temporaryong pagkaduea it power supply kahapon it aga-aga bandang alas-4:00 hasta it alas-5:00.
Ginpaathag ni Engr. Jude Ropa it Aklan Electric Cooperative ukon Akelco nga nagpatigayon ro National Grid Corporation of the Philippines ukon NGCP it normalization and load transfer sa Altavas Sub-station pabalik sa Nabas Sub-station.
Ro mga naapektuhan nga lugar hay ro mga kabanwahan sa unang distrito it probinsya kamana man ro ibang banwa sa second district kaeakip eon ro banwa it Pandan ag Libertad sa probinsya it Antique.
Sa pihak kara, ginpasiguro ni Engr. Ropa nga uwa it power interruption nga matabo sa highlights it selebrasyon it Kalibo Sr. Sto. Niño Ati-Atihan Festival 2023 mag-eowas eon lang sa mga inde malikawan nga hitabo nga nagatuga it pagkaduea it power supply.
