KALIBO, Aklan—Ginpasiguro it National Grid Corporation of the Philippines ukon NGCP-Visayas ro pag angkon it establi ag bastante nga supply it kuryente sa bilog nga Western Visayas.
Raya ro ginpahayag ni Reagahn Alcantara, tagapaghambae it NGCP-Visayas.
Apang suno kana nga kon amat hay indi malikawan nga makaangkon it mga makadali nga power interruption tuga it unscheduled nga mga brownout bangud sa mga problema sa linya.
Ginpaathag nana nga nagapaguwa man sanda it nagakaigo nga abiso kon nagapatigayon it scheduled nga power interruption tuga it mga ginapatigayon nga maintenance works ag iba pa.
Kaeabanan sigon nga nagakatabu ro power outages kon tig-ueuean kapareho it natabu ko Hulyo sa pagpanaeasa it bagyong Egay ag pagsueod it mga kasapatan kapareho it sawa sa andang linya.
Kadungan kara, nag apela ro NGCP sa mga pumueuyu nga magbulig sa pagpatigayon it clearing operations agud nga mamintina ro kaayusan it andang transmission lines pinaagi sa pagtapas sa mga sanga it puno nga nagasab-eay sa andang mga linya partikular sa mga maeayo nga lugar.
Ginpahayag dugang nga nagapabilin ro andang commitment nga makaangkon it maayos nga transmission grid agud nga makatau it mayad nga serbisyo sa mga konsumidor.