KALIBO, Aklan–Owa pa it gintau nga deadline ro National Housing Authority ukon NHA kon hin-uno iga-award ro mga housing units sa banwa it Batan partikular sa Barangay Bay-ang nga haeos an-um nga dag-on eon nga nakatiwangwang.
Suno kay Engr. Antonio Del Rosario, Regional manager it NHA Regional Office 6 nga may ap-at nga packages ro housing projects it gobyerno sa nasambit nga lugar, apang ro Batan 1 and 2 pa eamang ro haeos nakompleto eon.
Ro kada proyekto sigon hay nagabalor it 98.5 milyon pesos.
Nasayuran nga umpisa ko 2016 pa nagahueat ro mga beneficiaries nga maitau eon kanda ro pabaeay agud nga andang ma-okupahan.
Apang suno kay Engr. Del Rosario nga nagapabilin nga pending ro pag-award kanda kara bangud sa isyu it pagpa-titulo it eugta.
Ginpahayag kara nga bukon nanda it kontrolado it kontraktor ro sitwasyon bangud nga raya hay trabaho eon it register of deeds.
Sa pihak kara, ginpasiguro man it NHA Regional Manager nga posibleng antes nga matapos ro termino ni Pangueong Rodrigo Duterte hay mai-turn over eon sa lokal nga gobyerno it Batan ro proyekto agud nga pormal eon nga ma-okupahan it mga benepisyaryo ro mga pabaeay nga nakataeana kanda.
