KALIBO, Aklan—Nagpaabot it reklamo sa Bombo Radyo si Mrs. Ammy Dela Cruz, residente it Talisay Road, Brgy. Linabuan Sur, Banga angot sa sueat nga ginpadaea kana it National Irrigation Administration (NIA)-Aklan.
Suno kana, gusto sigon it taeatapan nga pahalinon imaw sa anang gina-istaran bangud ro eugta sigon nga ginatindugan it andang baeay hay ginapanag-iyahan it NIA.
Apang, depensa ni Dela Cruz bukon eamang sigon it imaw ro naga-isaeahanon nga nagpatindog it baeay sa binit it irigasyon.
Gusto eamang sigon nana nga maging patas ro pagtratar it taeatapan rason nga kung gusto sigon nanda imaw nga pahalinon hay dapat kaibahan ro iba pang panimaeay nga nakatindog sa binit it kanae.
Sambilog sigon sa rason it NIA sa pagpahalin kana hay para limpyuhan ag i-semento ro binit it irigasyon.
Aminado man imaw nga ginapanag-iyahan it NIA ro nasambit nga eugta apang bukon sigon it makatarungan kung imaw eamang ro pahalinon.
Samtang, ginklaro man it National Irrigation Administration ukon NIA-Aklan nga tanan nga tag-ana it panimaeay sa nasambitang lugar nga nagasab-eag sa right of way it irigasyon hay ginpadaehan nanda it sueat.
Suno kay Senior Irrigator’s Development Officer Julieta Gallardo it NIA-Aklan nga posible sigon nga maka-obstruct sa operasyon it pagpatubi ukon pagpanghawan it kanae ro mga nasambitang struktura.
Tanan sigon nga mga nagapatigayun it konstruksyon sa binit it iragasyon hay hugut nandang ginabawaean.
Dapat sigon nga malimpyo ag owa it nagasab-eag sa right of way agud nga owa it magiging problema sa clearing operation.
