KALIBO, Aklan—Ginpasiguro it National Irrigation Administration ukon NIA-Aklan nga bastante ro tubi sa irigasyon para sa kinahangeanon it mga mangunguma sa pag-umpisa it regular cropping.
Suno kay Jaime Ibardolasa, senior water facilities technican it NIA-Aklan nga owa it problema ro supply it tubi sa eastern side partikular sa mga banwa it Kalibo, Banga ag New Washington bangud nga bastante ro tubi sa Aklan river eabi eon makaron nga nag-umpisa ro tig-ueu-ean.
Maskin sigon nga ko Mayo 1 pa nag-umpisa nga magpa-tubi sanda sa irigasyon hay sangkiri pa eamang nga mga mangunguma ro naka-umpisa it pagtanum it paeay ukon 30% it kabilugan nga 2,277.50 ektaryang kaeanasan nga ginaserbisyuhan it NIA sa eastern side.
May scheduling sigon ro pagpaguwa it tubi sa irigasyon, apang kon bastante ro tubi hay ginabuksan ro tanan nga lateral ukon aeagyan it tubi.
Sa pihak nga parte, ginlaygayan ni Ibardolasa ro mga mangunguma nga umpisahan eon ro pagpananum agud nga indi maapektuhan it ginapaabot nga El Niño phenomenon sa buean it Hulyo, kun sa siin agud nga pag-abot it nasambit nga tiempo hay maga-focus eon lang sa crop maintenance nga indi eon magakinahangean it maabu nga volume it tubi.
Sa pihak nga parte, ginpahayag ni Antonette Trinidad, senior water facilities technican it NIA-Aklan nga kon bastante ro water supply sa eastern side hay problema nanda ro water source sa western side.
Aminado imaw nga iba ro sirkulasyon it water delivery sa anang nasakupan bangud nga ro andang source hay sa Kinalangay Nuevo nga masyadong manaba ro elevation it tubi sa suba kumpara sa eastern side nga sa bukana it Aklan river.
Nagaeaum man sanda nga matapos eon ro andang proyekto nga makadugang it supply it tubi.
Angot kara, dere-deretso sigon ro andang ginapatigayon nga pakikipag angot sa mga mangunguma para sa iba pang mitigating solutions engkaso nga tumama ro El Niño nga panigurado nga pagakueangon ro supply it tubi sa bilog nga coverage area kara.
