KALIBO, Aklan— Ginpasiguro ni Engr. Lorena Sioco , head it National Irrigation Administration ukon NIA-Aklan nga posibleng sa masunod nga mga inadlaw hay eubusan eon nga mapatubi-an ro mga irrigation canal sa probinsiya it Aklan.
Raya hay matapos nga ko Setyembre 1 eamang sigon nanda raya ginbuksan matapos ro daywang domingo nga pagpasarado bangud sa ginpatigayon nga construction project sa lateral C.
Nasayuran nga pilang mangunguma sa Eastern Side partikular sa mga Barangay it Estancia, Tigayon, Linabuan Norte ag Sur ro nagreklamo bangud sa kawad-an it tubi sa andang kaeanasan nga eubus nga kinahangean it andang mga tanum nga paeay.
Ginpaathag ni Engr. Sioco nga bangud nga halin eon sa dam ro source it andang water supply hay nagapatigayon sanda it scheduling sa pagpatubi.
Apang sa pihak kara, bastante eon sigon makaron ro andang supply it tubi.
Nakaangkon eamang sigon it irregular nga supply ko nagtaliwan nga daywang domingo bangud sa hinyu it pilang irrigators association nga maayos ro andang irrigation canal.
