KALIBO, Aklan—Ginpasiguro it National Irrigation Administration (NIA) Aklan nga makaangkon eon it bastanteng supply it tubi nga pang-irigasyon sa mga kaeanasan sa probinsiya it Aklan.
Ginpaathag ni Engr. Juliet Gallardo it NIA-Aklan nga matapos nga ginsaraduhan it daywang domingo ro irrigation canal agud nga mataw-an it daean ro pilang ginpatigayon nga construction it lateral C section it aeagyan it tubi hay pormal eon nanda nga ginbalik ro water supply.
Natapos eon sigon ro construction rason nga gin-umpisahan eon nanda nga magpaguwa it tubi sa mga kanae it irigasyon kahapon.
Ro reklamo hay nauna eon nga ginpaabot it mga mangunguma nga halin sa Candelaria, Jugas, Lawaan, Pagsanjan ag iba pang lugar kasunod it naexperiensiyahan nga problema sa suplay it tubi nga eubus nga kinahangean sa andang tanum nga paeay.
Samtang, gindugang pa kara nga mabahoe nga bulig ro gintukod nga diversion dams para sa Aklan River Irrigation System nga nahamtang sa Barangay Sigcay Banga ag Barangay Kinalangay, Malinao.
Raya hay sa pihak nga owa pa eubus nga nakompleto ro pagbutang it pilang steel gates bangud sa pahayag it contractor it proyekto nga nadelay sigon ro pag-abot it andang mga materyales halin sa Cebu tuga it naexperiensiyahan nga covid 19 pandemic.
