KALIBO, Aklan—Operational eon ro dam it National Irrigation Administration sa Brgy. Kinalangay Viejo, Malinao ag sa Brgy. Sigcay, Banga.
Suno kay NIA Aklan head Engr. Lorena Sioco, raya hay maskin nga uwa pa nakaabot ro steel gate nga ginfabricate sa syudad it Cebu bangud sa epekto it Covid-19 pandemic.
Nahuman eon suno kana ro structures rason nga 83 porsyento it mga kaeanasan eon ro andang napatubian.
Samtang 15 porsyento pa eamang ro nakaumpisa it pagtanom it paeay.
Ginaeauman nga magataas ro nasambit nga porsyento makaron nga buean it Hulyo.
Ginpahayag dugang ni Engr. Sioco nga gina-adopt eon nanda ro new normal nga sistema kon sa siin hugot man nandang ginaimplementar ro minimum health standards kontra sa pagkalhit it sakit nga Covid-19.
Kaangot kara, gin-engganyo nana ro mga mangunguma nga maging updated sa anunsyo it ahensya pinaagi sa social media, television ag radyo agud nga masayuran it mga raya ro alternatibong programa para kanda sa tunga it pandemya.
