KALIBO, Aklan–Balik eon sa dati ro night life sa Isla it Boracay.
Suno sa musikerong si Michael deniega, mag-eowas nga ginbo-oe ro curfew ag liquor ban, bukas eon man ro night market ag hilway eon nga nakakatukar ro mga live band, inuman ag iba pa rason nga uman nga mabatyagan ro kapagsik it pag-negosyo sa lugar.
Bangud kara, ginpahayag nana nga maabu nga pumueuyu ro uman nga nataw-an it trabaho eabi eon sa mga bar and restaurants.
Mabahoe man sigon raya nga bulig kanda bangud nga nagtaas it sangkiri ro andang kita bangud sa mga nababaton nga tip halin sa mga customer.
Sa makaron suno kana hay owa pa nanda naabot ro dating income kat owa pa tumama ro pandemya.
Haeos 80 porsiyento sigon it mga bisita nga nagasueod hay domestic tourist ag ro nabilin nga 20 porsyento hay mga dumueuong.
Sa pihak kara, hugut nanda nga ginasunod ro patakaran it lokal nga gobyerno it malay eabi eon ro pagpatuman it social distancing, pagsuksok it face mask ag ro pagpanaba it sound it mga ginatukar pag-abot it alas-10 it gabi-i agud nga mataw-an it kahigayunan ro ibang turista nga gustong magpahuway it temprano.
Gina-abot suno kana kon amat ro andang pagtukar it alas-12:30 hasta ala-1 it aga-aga kapin kon maabu pa ro bisita.
Bawae suno kana ro jamming ag pagsaot sa tukar it banda ag indi eon pwedeng mag-set up sanda sa frontbeach.
Sa pihak nga parte, kontrolado eon suno kana ro tawo nga nagsueod sa isla ko Love Boracay.
