KALIBO, Aklan—Ninahan ro sangka eaeaki matapos nga gin-eabo bandang alas-5:00 it hapon sa Brgy. Tibiawan, Makato.
Nakaangkon it lastro sa waea nga dahi ro biktimang si Joselito Taborda, 48-anyos matapos nga gin-eabo it ginatumod nga suspek nga si Julius Ordollo, sa legal nga edad ag parehong residente it nasambit nga lugar.
Sa inisyal nga imbestigasyon it Makato PNP, gin-adtunan it suspek ro biktima sa andang baeay kon siin ginhueat pa nana raya nga makaabot.
Kat nataeopangdan eon kara nga nagapaabot si Taborda hay insigida imaw nga nagbueo it sanduko ag ginhandos sa biktima.
Bangud kara, maabtik man nga nakabueo it butong ro biktima nga ana man nga ginsagang sa pag-eabo ni Ordollo.
Apang, naninahan gihapon imaw sa dahi nga gilayon man nga gindaea sa baeay paboengan kon siin imaw sa makaron padayon nga naka-confine para sa nagakaigong pagbueong.
Samtang sa pihak nga parte, boluntaryo man nga nagsurender sa kapitan it barangay si Ordollo ag ginturn-over sa taeatapan it pulisya kon siin imaw sa makaron temporaryong nakakustudiya para sa nagakaigong disposisyon.
Ro insidente hay padayon pang ginaimbestigahan it Makato PNP.
