Inde magnaba sa limang pasyente ro namatay sa National Kidney and Transplant Institute (NKTI) bangud sa leptospirosis, kasunod raya it pilang dominggong mga pag-uean ag pagbaha tuga it Habagat.
Base sa datos it ospital halin ko Hunyo umabot eon sa 19 nga kaso it leptospirosis ro andang nailista kon sa siin ro ulihing biktima hay namatay matapos maglala ro kondisyon ag makaangkon it pulmonary hemorrhage ukon pagdugo sa baga.
Suno kay NKTI nephrologist Dr. Arlene Lamban-Crosson, maabong pasyente ro nagaadto sa ospital nga may una eon nga severe cases bangud sa uwa eagi nakikita ro andang mga sintomas rason para maglala raya antes pa man sanda makaadto sa ospital.
Kaibahan sa mga unang sintomas ro eagnat, pagpanakit it eawas ag kasu-kasuan, ag pagpamuea it mga mata.
Kon maglala mat-a, posibleng makaangkon it pagpanueaw it panit ukon mata, pagbag-o sa kulay it ihi, pagnaba it kaabuon it ihi, ag pag-ubo ukon pagsuka it dugo.
Angot kara, padumdom it mga awtoridad, hangga’t pwede hay likawan nga mag-eosong sa baha kapin eon kon may nina.
Kon inde malikawan, gumamit it rubber boots ag siguraduhon nga maayos nga natatabunan ro anumang nina.
