Gin-engganyo it Department of the Interior and Local Government (DILG) ro mga local government units (LGUs) nga magpasa it ordinansa para i-obliga ro mga business establishment nga mag-install it closed-circuit television ukon CCTV systems antes isyuhan it business permits ukon ro “No CCTV, no business permit policy.”
Partikular nga gintumod it DILG nga dapat nga ipatuman ro nasambit nga polisiya sa mga establisyemento nga may maeagkong numero it mga customers nga nasa risk ag hazard-prone.
Suno kay DILG Secretary Eduardo Año, ro concurrent chairperson man it National Peace and Order Council nga kadungan it uman nga pagbaealik it mga tawo sa andang pre-pandemic ways, importante nga iprayoridad it mga LGU ro kaeuwasan it publiko ag ro CCTVs hay sambilog sa pamaagi nga magamit it mga LGU para siguraduhon ro seguridad it publiko, malikawan ro anuman nga krimen ag matumod ag madakpan ro mga perpetrators.
Pila sigon sa mga establisyemento nga kinahangean magbutang it CCTV hay ro financial establishments kapareho it bangko, pawnshops, money lenders, ag money remittance services ag business establishments nga may mga branches kapareho it mga shopping malls, shopping centers, supermarkets, wet markets ag medical facilities ag iba pang business establishments.
