NATIONAL News — “No collection policy,” uman nga ginpadumdum it DepEd
Uman nga ginpadumdum it Department of Education (DepEd) ro andang mandu nga ginabawae ro pagpangkolekta it maskin anuman nga klase it baeayran halin sa mga estudyante ag manugturo sa enrollment period ag iba nga tiempo sa kabilugan it academic year.
Sa DepEd Memorandum No. 41, s. 2024 ukon ro The Reiteration of the ‘No Collection Policy’ sa mga eskwelahan, ginpahayag ni Education Secretary Sonny Angara sa mga opisyales nga instrikto ro pagbawae it ahensya sa pagbaligya it mga ticket ag mga koleksyon.
Sakop man sa mandu ro mga pampubliko ag pribado nga mga eskwelahan, kolehiyo, ag mga unibersidad.
Suno sa DepEd, naeakip sa prohibisyon ro bisan sin-o man nga tawo para sa nagkaeain-eain nga proyekto ag tuyo, boluntaryo man raya ukon bukon.
Apang,k ginklaro man ni Angara nga owa naeakip sa nasambit nga polisiya ro membership fees sa Red Cross, Girl Scouts of the Philippines, ag Boy Scouts of the Philippines, kamana man ro mga kontribusyon it mga ginikanan ag iba pa nga donors ag stakeholders para suportahan ro mga barrio high schools.
Nagpaandam man ro ahensya nga ro sin-o man nga mag-eabag sa prohibisyon hay magapangaatubang it multa ukon pagkapresu.
