KALIBO, Aklan—Ginaduso makaron sa sangguniang panlalawigan ro sangka resolusyon agud nga mapatuman sa mga bukon it urbanized area ro no-helmet policy bangud sa mga nagakatabu nga pagpamatay nga kahimuan it mga motorcycle riding suspect.
Suno kay 1st district board member Nemesio Neron, chairman it committee on peace and order nga raya hay may kaangtanan sa andang naka pending nga inquiry angot sa owa pa naresolba nga mga kaso it pagpamatay it riding in tandem sa probinsiya it Aklan.
Gusto ni Neron nga indi eon magsuksok it helmets ro mga motorcycle drivers kaibahan ro angkas sa mga barangay roads nga bukon man it masako.
Tuyo kara nga indi maitago it mga riding in tandem ro andang identity ukon pagkatawo kon nagahimo it krimen.
Raya hay sa pihak nga ro plano hay magabaliktad sa laye nga naga-obliga sa mga motorcycle riders nga magsuksok it helmets sa tanan nga oras kon nagasakay sa andang mga motorsiklo.
Sa pihak nga parte, paga-usisaon sigon nana sa andang secretariat kon hin-uno uman nga iga-schedule ro napurnada nga legislative inquiry angot sa nasambit nga topiko ko nagtaliwan nga domingo bangud sa pagbisita sa aklan ni pnp regional director Brig. Gen. Sidney Villaflor para sa command conference kun sa siin masako ro provincial director ag tanan nga mga hepe it nagkaeain-eain nga municipal police stations sa Aklan.