KALIBO, Aklan—Agud nga matapna ro pagkalhit it COVID-19, pilang banwa sa Aklan ro hugut nga nagapatuman it “No Movement Sunday”.
Ginpaathag ni Malinao Mayor Josephine Iquiña, nga ro mga authorized person outside of residence, may mga importanteng paeanawon ag transaksyon kamana man ro essential workers eamang ro ginapasugtan nga magguwa it andang mga baeay kada domingo nga adlaw.
Ro mga baeak-eon it mga residente sa banwa hay ginatugyan sa mga opisyal it barangay.
Sarado man ro tanan nga mga establisimento komersiyal ag hugut ro pagpatuman it border control checkpoints sa mga kabarangayan.
Ro mga botika ag gasolinahan eamang ro ginapasugtan nga magbukas sa nasambit nga adlaw.
Ginklaru man kara nga ro quarantine pass hay para eamang sa sueod it banwa samtang ro travel pass hay kon nagapa-kalibo.
Limitado sa 15 ro andang gina-isyu para sa mga essential travel.
Mag-eowas sa Malinao ag Banga, ginatun-an man it iba pang banwa sa probinsiya ro pagpatuman it nasambit nga patakaran.
Presenteng ginapatuman sa Aklan ro modified enhanced community quarantine hasta sa Agosto 15.
Samtang, umabot sa 595 ro bag-ong kaso it COVID 19 sa Aklan kahapon matapos mapas-eawan nga makasumite it datos ro Aklan Provincial Epidemiology Surveillance Unit it Provincial Health Office umpisa Agosto 1 hasta 3.
