KALIBO, Aklan—Hugut nga ginapatuman gihapon sa banwa it Banga ro “no movement sunday” agud nga malikawan ro pagkalhit it COVID-19.
Suno kay Ms. Donnalyn Siyambio, tagapaghambae it municipal inter-agency task force it LGU-Banga nga naka-depende sa mandu ni mayor Erlinda Maming ro pagduea sa nasambit nga mandu eabi eon kon mapanaba ro quarantine classifications it Aklan halin sa modified enhanced community quarantine ukon MECQ nga extended hasta sa Agosto 31.
Sa idaeum it sueondanan, ro mga authorized person outside of residence, may mga pagabak-eon sa botika ag essential personnel eamang ro ginapasugtan nga magguwa it andang mga baeay kada domingo nga adlaw.
Sarado man ro tanan nga mga establisyimento kaeakip ro andang merkado publiko.
Ro ginapasugtan eamang hay ro mga botika ag fuel station.
Ko Agosto 17, suno kana hay nadugangan it 22 ro andang new cases rason nga nagapabilin nga punuan ro andang quarantine facility kun sa siin hay ginpasugtan eon ro home quarantine ag gin-activate ro andang barangay isolation unit.
Nagpanawagan man imaw sa mga taga-Banga nga indi maging pasaway ag magsunod sa minimum health protocol bangud nga masyado eon nga gaoy ro mga health workers nga nagatatap sa mga pasyenteng may covid.
