KALIBO, Aklan—Ginproponer ni Kalibo Sangguniang Bayan member Ketchie Luces nga himuon nga rest day ro adlaw it Dominggo sa banwa it Kalibo sa tunga it pagtinaas sa kaso it Coronavirus Disease 2019 ukon COVID-19.
Bilang Chairman it Committee on Health, ginpakamayad sigon ni Luces nga maghimo it sangka resolution kun siin natigayon man nga matalakay kahapon sa session it Sangguniang Bayan.
Suno kay Luces, aprubado man it haeos tanan nga miyembro ro anang rekomendasyon.
Apang, ginklaro man kara nga owa pa raya ginapatuman ag nakataeanang pang talakayon it mga miyembro it Municipal Inter-Agency Task Force (MIATF) ag ni Mayor Emerson Lachica.
Ro nasambit nga rekomendasyon hay kasunod it mga tikang nga ginhimo it pilang ka mga munisipalidad sa Aklan nga nagpatuman it “No Movement Sunday”.
Sa pihak nga parte, nagpaabot man it owa pagpabor si Kalibo Sangguniang Bayan member Augusto Tolentino sa proposisyon it kaparehong SB member nga magpatigayun it No Movement Sunday.
Suno kana nga mabahoe ro magiging epekto kara sa ekonomiya ag kita it mga vendors, iba pang negosyante ag mga una sa transportasyon.
Ginsuhestiyon man kara nga dapat mag-atubang ro MIATF ag Municipal Health Office agud nga maidid nga maistoryahan ro nasambit nga tikang.
Dapat man sigon nga imbitahan sa pueong ro mga apektadong sector agud nga maging patas ro pagahimuon nga desisyon.
